Luk 2 | MYW | STEP | Gwad towen Yon igaw kakit, king avakaein yagan Sisal Ogoustos mo ikaleiwag ma̱wana gabman, va̱gan bileles yiges gamag babaw, ven meiveka wasigeis.

Luke 2

Meliy ikop natun Yeisuw

(Matiw 1:18-25)

1 Gwad towen Yon igaw kakit, king avakaein yagan Sisal Ogoustos mo ikaleiwag ma̱wana gabman, va̱gan bileles yiges gamag babaw, ven meiveka wasigeis.

2 Inakaleiwag towen wanamug, anatut mtowen Kwilinis nikaluweg ven yagan Siliy.

3 Sisal ikaleiwag ikous; mo inounas gamags meivek-wan, ineis wasiven tatineis, silma̱nin yiges bileles.

4 Yosep-vak ilisow ven Nasalet wawnuwan Galiliy, ikatulags ineis Yudiy, Deibid inaven yagan Betelem, peinan Deibid delen mtowen; e, bilel kid yiges son nakwav Meliy, ankuda̱pom.

6 Asteiy nisesus Betelem, mo ilouvat anatut bo nitup.

7 Nitup mana̱wen, peinan anigavaw, mo ikop natun kuda̱taw. Isumweil anakweim, isen wada̱wag, bulumakaw astavalel waseg, peinan nag ivag a̱ban wanuwan bunatum. Singay gamag babaw.

Tamtakavateins aleis sip inekes Yeisuw

8 Ven towen tamtakavateins aleis sip wanawoud boug waseg nimtakavates aleis.

9 Yowbad nataka̱yob mo isap wasigeis, Yowbad inakamnat imteil ven towen nisikes; mapuna ivag aspwa̱yat.

10 Anelos towen idibakes, ilana, “Awoum beivag amipwa̱yat, peinan basekeimiy mwa̱saw liva̱nen, simiyas meiveka gamag.

11 “Nagein gog, Deibid inaven waseg na̱tan vin bo ikop mtowen takatinabweimiy, daGuyaws Kelis.

12 “Igaw bukuba̱nes a̱pwaw nisumweilis anakweim nimmasis wada̱wag, bukukines mo bukukwakins mtowen Kelis.”

13 Ilivan ikous, nuwanaw mo inekes min-liba̱lab singay babaw, ikavasis Yowbad, ilansa,

14 “Singay tayakawanes Yowbad walba̱lab;
O niwal watinow wasigeis tasiyas tasiwa̱youbs.”
15 Anelos tasiyas mo ilisawes, iyum ineis walba̱lab, tamtakavateins aleis mo illivans sisiyas, ilansa, “Kumeis, taneis Betelem, bitakines youd towen nikamat, peinan daGuyaws bo ikamtilakeids.”

16 Iliva̱nes ikous, nuwanaw ineis, iba̱nes Meliy son Yosep, sisiy a̱pwaw nimmasis wada̱wag.

17 Ikines ikous, mo ikamteles liva̱nen gwad towen, peinan gum-liba̱lab nikamtilakes.

18 Tasiyas tamtakavateins aleis ikamteles asilivan ikous, o tasiyas niliganes bo isom ninous.

19 Tage Meliy isesuna, ininuway youd tasiyas waseg.

20 Tasiyas tamtakavateins aleis mo iyums, iya̱kawns waseg Yowbad, peinan ma̱wan gum-liba̱lab anilivan, youd babaw ikines o iliganes ma̱wan.

Inawes Yeisuw Yowbad wanbunatum

21 Yam kweinim kweitoun ikous, mo ibwabwes momwan gwad towen, idokes yagan Yeisuw; peinan gum-liba̱lab bo idok yagan kweiboug, inan nag isum; igaw-wan.

22 Wankuyeim anatut bivka̱yes bikamnat ma̱wan Moses nakaleiwag, mo ikopwes gwad towen, ikatulags ineis Yelusalem, inawes Yowbad waseg.

23 Peinan Yowbad inakaleiwag waseg anilivan nileles mamagina, “Igaw vin bikop natun kuda̱taw anigavaw waseg, mo bakayus, kudokes ‘Yowbad angamag towen.’”

24 Mapuna ineis Yelusalem va̱gan beiweiys man mwasanin, bigabus silma̱nin Yowbad, peinan inakaleiwag waseg ilana, “Kuweiys kulitapip mwanay, o kukin nag, mo bwabun mungogewns mwanay.”

Simiyon anilivan

25 Ven Yelusalem taw teitan yagan Simiyon, tadidumwal, ansinap bwein. Ikkayamat anatut Yowbad bisiwyoubus tasiyas min-Yisleil va̱gan beitay nuwes. Yowbad Kululuwan waseg taw towen, bo ikatimlakay mo ikakin bisesuna ee... bikin daGuyaws inaMesay Kelis, mo bikanig wankuyeim.

27 Yowbad Kululuwan imgwey taw towen mo inoun in Yowbad wanbunatum. Taman son inan bo ikopwes nitus mtowen Yeisuw, isiws wanuwan bunatum va̱gan biva̱ges peinan, ma̱wan sikikun kweiboug Yowbad inakaleiwag nilel Bukitab waseg.

28 Mtowen Simiyon im inekes, ikin gwad towen, inup, iya̱kawn waseg Yowbad, ilana:

29 “MaGuyaw yak, o yey mutouwat,
Tut towen amwa̱saw.
Kukilaveig bakanig niwal waseg,
Ma̱wan nukulivan.
30 “Peinan wamatag bo akin mtowen
takatinabweids.
31 “Inawotet nukwaluweg wamtes gamag babaw,
va̱gan bimteilis tasiyas igaw dadub, tobwag ven wasigeis,
mo bikakins tasiyas, bikamnats.
Inawotet-vak silma̱nin yakawanan mubod
yakamey min-Yisleil.”
33 Taman son inan iliganes liva̱nen nitus, isom ninous silma̱nin.

34 Simiyon mo isekes anilivan bwanabwein, idibek gwad inan, ilana, “Peinan gwad towen inawotet igaw bikow, mo min-Yisleil mwasanin bikalivatows o mwasanin bitamanaws. O mwasanin bikines nawotet ma̱wana naman mulin Yowbad, tage bitawyages.

35 “Ya̱koum-vak, woum bimouvit, singay bigeg nanoum. Tage mtowen inawotet va̱gan bitakakins ninous babaw gamag.”

An ikin gwad

36 Palopit na̱tan yagan An, taman Panuwel, anakum Asel. Bo ivnaveka singay. Igaw naptabod isesuna ee... mo ivays son namwan. Asibweilim nisikes son namwan kweinim kweiy. Namwan mo ikanig. E, isesuna nakwab ee... mo ivag anbweilim sinwanim sinwatoun kweivas. Nag ilisow Yowbad nabunatum, ikikulul wamatan Yowbad yam o boug, ipsapos o ininitoug.

38 Anatut tasiyas sisiy nitus nimeis, mo isap mana̱wen vin, ikalin nuwan waseg Yowbad, o idibakes tasiyas min-Yelusalem, ilana, “Gwad towen inawotet va̱gan bikatinabweids”; peinan tasiyas nikaymates teitan gamag beim silma̱nin nawotet towen.

Yeisuw itub, ivakaein

39 Tasiyas son nakwav iyakousis youd babaw silma̱nin Yowbad nakaleiwag, mo iyums ineis Galiliy wasiven Nasalet.

40 Yowbad ikalin nuwan waseg gwad towen; bo itub, ivakaein bo itawtoun, bo ivag nanon; bo ivag ansinap avakaein.

Yeisuw ilivan siney takatimlakays

41 Taman o inan, asigulagul bweilim kanatok kanatok inineis Yelusalem silma̱nin Kaltuwon Sigeilin.

42 Yeisuw anbweilim sinwatan kweiy, ikatulags ineis Yelusalem, ma̱wan asigulagul kweiboug.

43 Sagal towen iyakousis, iyums ineis wa̱ked, tage nitus nises Yelusalem. Taman inan nag ikakins, idokes kid sisiy, peinan babaw gamag. Inounas ee... iboug, mo inineivs tawlisiyas o sisiyas wasigeis.

45 Ininineivs bo nag, mo iyumnavaws ineis Yelusalem, ininevs nitus.

46 Ininineivs yam kweitoun, mo iba̱nes Yowbad wanbunatum, nisesus ikkaypuls siney tasiyas takatimlakays, iligen asilivan o ikatitugan wasigeis.

47 Babaw gamag niliganes ansinap waseg ikatimop asilivan, isom ninous, peinan ansinap singay-wan.

48 Taman inan ikines, bo isom ninous; inan mo idibek, ilana, “Natug yak, aveiyag wawun nukuva̱gem ma̱wan? Soug tamam nakanineveim, ikubukub nuwem seikwan.”

49 Iwa̱ge, ilana, “Aveiyag wawun kunineveigs? Tabta kukwakins yey nases tamag wanbunatum?”

50 Tage tasiyas nag ikakins livan towen nidibakes.

51 Siney tasiyas mo iwloubus ineis Nasalet, mtowen bo ikanaway ages; tage inan ininuway youd tasiyas silma̱nin.

52 Yeisuw bo itub ivakaein, bo isinap. Yowbad ikalin nuwan, o gamag ikalin nuwes waseg.